Bi kurtî li ser kar û xebatên
KOMKAR-Swêdê:

KOMKAR-Swêdê di vî warî da hîna di salên pêşîn da xebatên gelekî hêja û berbiçav kirin. Ji bo danasîna gelê Kurd, welatê wî, doza wî ya heq bê westan xebitî. Rûyê rastî yê dewleta tirk a kolonyalîst eşkere kir ji raya giştî ra. Wê ji tevgera azadîya gelê kurd ra gelek dost û alîkar peyda kirin. Helbet piştgirîya KOMKAR`ê ne tenê ji bo gelê me yê Kurdistana Bakur, lê her usa ji bo hemû parçeyên Kurdistanê bû, û îro jî usa ne. Di nav van bîstûsê salan da, KOMKAR-Swêdê carina bi hin komeleyên din re tevayî, carna jî bi tenê gelek çalakîyên curbecur kirine. Bi dehan car meş, mîtîng û civîn saz kirine. Bi hezaran belavok, afîş û bultenên înformasîyonê belav kirine.

KOMKAR-Swêd, wek komeleyeke demokratîk ji mihacirên kurd ra her tim bûye dergehekî alîkarîyê. Her wext lokala wê hebûye. Li wê derê însanên me civîyane, hatine ba hev li ser pirsên welat, li ser jîyana xerîbîyê guhdarîya hevdu kirine, ji bo pirsên xwe yên rojane alîkarî xwestine, tev li xebatên komelê bûne.

Komelê, di gel çar komeleyên din, di gulana 1991-an da cara pêşin FEDERASYONA KOMELEYÊN KURDISTANÊ LI SWÊDÊ avakirîye.

KOMKAR-Swêdê bihayekî mezin daye xebatên ser ziman û çanda kurdî. Ew ji zûda bûye navendeke çanda kurdî.

Komela me ji sala 1978-an heta niha, 21 sal e kovarekê derdixe bi navê ROJA NÛ. Kovara ROJA NÛ di destpêkê da bi tirkî û kurdî derdiket, lê ji sala 1983-an şûnda tenê bi zimanê kurdî derket. Ew heta niha (cotmeh 1999) gihîştîye 104 hejmaran.

Komelê di sala 1980-an da weşanxaneyek vekir û dest bi çapkirina pirtûkên kurdî kir. Heta niha nêzîkî 50 kitêbên kurdî, dîwan, roman, li ser tarîxa Kurdistanê, gramer, dersên zimanê kurdî, folklor, pîyes û hwd. hatine weşandin. Xizmetên ku KOM-KAR`ê li dervayî welat pêşkêşî ziman û çanda kurdî kirîye, îro êdî bi xurtî xwe digihîne hundurê welat jî. 15-20 sal berê kesên ku bi kurdî dixwendin û dinivî-sandin ne gelek bûn. (Li Kurdistana Bakur.) Lê îro li hundir û derva bi dehan rojname û kovarên ku xwerû bi kurdî derdikevin hene. Di vê pêşketinê da xebatên KOMKAR-Swêdê jî roleke baş û berbiçav leyîstîye. Dijminên gelê kurd dewletên kolonyalîst û xasma jî dewleta tirk ya hov û şoven propaganda dikirin ku zimanekî kurdî tune, kurd bê binyat in, bê dîrok û çande ne. Xebatên KOMKAR-ê di vî warî da bûye parçeyekî xebata pûçkirina derew û propagandayên kolonyalîstan.

Me bi kurtî behsa komeleyeke kurdî û kar û barên wê yên 25 salan kir. Bêguman çavkanîya xebata wê ya evqas salan ku bêwestan dom kirîye, bîr û bawerîya wê ya xurt ya ji bo azadîya Kurdistanê ye. Kurdistaneke azad û jîyaneke serfiraz li ser axa kal û bavan, herdem hêvî û armanca wê bûye. Hêvîya me îro ji her wextê xurttir e. Bivê, nevê , zû yan dereng gelê kurd wê azadîya xwe û welatê xwe bistîne. Ew roj ne dûr in.