Komciwan-Swêdê şevbihêrka biharê çêkir

Stockholm-29.05.2011- Komeleya ciwanên kurd Komciwan-Swêdê, piştî xilaskirina xebatên demsala biharê şahiya xwe ya xilaziyê çêkir. Di binê serweriya komelê de kursên govendê, tembûrê û zimanê kurdî tên derbaskirin. Li vira zarokên ji 5 salî heta ciwanên 18 salî beşdarî kursan dibin. Di dawiya termîna xebatê de, zarok û ciwan digel dê û bavên xwe di şevbihêrkekê de dicivin û zarok û ciwan hunerên xwe pêşkêşî dê û bavan û mêvanan didin.

Şevbihêrkê bi axftina serokê Komciwanê Ferhad Sönmez dest pêkir. Sönmez di axaftina xwe da bi kurtî behsa armanc û xebatên komelê kir. Sönmez spasdariya xwe ji bo mamosteyên kursên folklorê Atilla, Sorgul, Mîrza, Zerya û mamostayê tembûrê Yaşar, mamostayê zimanê kurdî Haluk Özturk û hevkar û rêvebirekî Komciwanê yê berê Şukrî Demîr kir. Bernama şevbihêrkê bi kurdî û swêdî ji alîyê Mîrza Karaduman Bîngöl û Zerya Özturk ve hat meşandin. Li ser navê Federasyona kurdan Çiyavan Şerîfî axifî û xebatên Komciwanê pesinand û jê ra serfifirazî daxwaz kir. Şevbihêrka bihara îsal jî bi xweşî derbas bû.

Em li vir gotara serokê Komciwan-Swêdê Ferhad Sönmez û çend dîmenên şevbihêrkê li jêrê pêşkêşî xwendevanan dikin:

”Em KOMCIWAN SWÊD îsal jî hatin dawîya termîna kar û xebata pêşî ya 2011ê. KOMCIWAN bi endamên xwe yên nû, bi aktîvîteyên xwe saleke din jî li paş xwe hişt. Payîz û zivistana giraniya Swêdê dê û bavên hêja bi zarokên xwe re rojên yekşeman hatin vir, zarok û ciwanên me beşdarî kursên cihê bûn. Komciwan ji bo gelek zarok, ciwan û dê û bavên kurd yên li Stokholmê bûye cihê civînê, cihê hevdîtinê û cihê fêrbûnê. Bi vê keyfxweşîyê ez li ser navê komîteya karger ya Komciwan Swêdê bi xêr hatina we dikim: Hûn hemû yek bi yek bi xêr hatine.

Komciwan li Stokholmê yek ji wan cihan e ku di entegrebûna zarok û ciwanên kurd de alîkarîya wan dike. Îdentîteta wan saxlemtir dike û ev jî dibe sebeb ku ciwan di 16, 17, 18, 19 salîya xwe de zûtir entegreya jîyana xwendinê, jîyana kar û jîyana sosyal ya Swêdê bibin, û ji îdentîteya xwe ya kurdî jî emîn bin. Bê guman mirov nikare encamên kar û xebata KOMCIWANê bi cetwelan bipîve, lê em dikarin bi serbilindî bibêjin ku di karê fêrkirina zimanê kurdî, kultura kurdî û hevnasîna ciwanên kurd de KOMCIWAN platformeke hêja ye.

Eger dê û bav, mezinên me, civaka kurd a li Swêdê û grupa kurd a li Stokholmê xurttir piştgirîya me bikin, em dikarin gelek karên baştir bikin: Em dikarin di warê entegrasyonê de, di warê alîkarîya ciwanan de, di warê têkilîyên civakî de baştir kar bikin. Loma dibêjim, alîkarîya dê û bavan, alîkarîya mezina û rêberîya wan û piştgirîya wan ji bo zarokên xwe, ji bo me, pir û pir muhîm e.  Ez hêvîdar im hûn berdewam alîkarîya me bikin, rê bidin zarok û ciwanên xwe ku ew jî fêr bibin û di hemû warên jîyanê de sibe kurdên ku hem hûn û hem em bi wan û bi xwe serbilind, peyda bibin.

Di dawîya gotina xwe de ez sipasîya endamên komîteya karger ya Komciwanê û hemû endamên KOMCIWAN SWÈDê dikim. Sipas ji bo mamosta Haluk Özturk, mamosta Yaşar, mamosta Atilla, Sorgul, Belma, Derya, Mîrza û Alpay. Sipas ji bo her kesê ku alîkarîya me kiriye.

Sipas ji bo endamên cîgir ên komîteya karger, Demîn, Hêlîn û Loryayê. Kek Şukrî sipas ji bo alîkarîya te ya hêja.”