Komciwan`ê di du festîvalan de folklora kurdî  pêşkêş kir

STOCKHOLM- Komela ciwanên Kurd KOMCIWAN-Swêd`ê van rojan li Stockholmê beşdarî du festîvalên herêmî bû. Komeke folklorê di 30-yê tebaxê de bi cil û bergên kurdî li ber dengê Dol û Zirnê, li ser sahneyên festîvala Hagalund, û di yekşema 6 meha îlonê di festîvala Tensta beşdarî kirin.

Ciwanên kurd li ciyên festivalan bi ala rengîn, cil û bergên kurdî û folklora me ya rengîn, xweşiyeke taybetî dan festivalan. Li meydana pêşangehê gelek ji kes û malbaten kurd yên ku li wir  kom bûbûn, dilxweşîya xwe nîşanî keç û xortên govendger dan. Ji ber van çalakiyan ew pesinandin. Bêguman swêdiyan û xelkên din jî bi heyranî li wan temaşe kirin, ketin destê wan û bi wan re govend gerandin.

Wek tê zanîn ji sala 1997 û virde, Komciwan-Swêd di xebatên xwe yê kulturî û komelatî, kursên folklor, muzik, zimanê zikmakî û sporê daye zêdeyî 800 xort û keçên kurd û nekurd. Kesên ku di zarokitîya xwe de di kursên Komciwanê´de bi xwe hatine perwerdekirin. îro bi xwe dê û bav in. Hinek ji wan  bi xwe mamosteyatîya kursan dikin û herweha zarokên xwe di kursan didin perwerdekirin.

Her rojên yekşeman li komeleya Komciwanê (li Alvik) ji katjimêr 11:00 hata 16:00, 4 grupên folkorê kom dibin û tên perwerdkirin. Jimara zarokên ku beşdarî kursan dibin  roj bi roj zêdetir dibe. Ev jî ciyê dilxweşiyê ye.

Komciwanê di roja 13-ê Îlonê de, piştî  civîneke giştî dest bi kursên payizê kir.

Şukrî Demir

Stockholm