Stockholm
Bayram Bozyel li ser “Berlêvebûna Pirsa Kurd” û helwesta HAK-PARê axifî

STOCKHOLM- 2009.11.07- Serokê giştî yê HAK-PARê Bayram Bozyel, îro li Stockholmê  li ser rewşa dawî ya li welêt û siyaseta partiya xwe û “Berlêvebûna Kurd” (*) axifî. Di Konferansa Bozyel de beşdarîyeke mezin hebû.  Gelek welatparêzên kurd ku ji bajarên Stockholm û Uppsalayê tevî civînê bûbûn, bi baldarî guhdariya axaftina Bozyel kirin, hinekan pirs jê kirin û yan jî raya xwe gotin. Civîn di atmosfereke erênî de derbas bû.

Bozyel di destpêka axaftina xwe de diyar kir ku ew giringiyeke mezin dide xebata kurdên Swêdê û welatên din yên Ewropayê. Bozyel, dilxweşiya xwe ji bona vê yekê anî ziman û weha got: “Bi rastî wan di pêşxistina karên dîplomatîk û xebatên ser ziman û çanda kurdî de roleke baş leyistine û dileyîzin.”

Bozyel di axaftina xwe de bêtir li ser pêvajoya nû û “Berlêvebûna Pirsa Kurd” sekinî. Wî li ser sedemên siyaseta nû ya dewleta tirk û faktorên sereke yên destpêkirina vê pêvajoyê qise kir û weha got: “ Dewletê êdî fehm kir ku nikare siyaseta xwe ya totalîter ya 85 salan bidomîne. Zordestî û înkariya mafên gelê kurd tu encam neda, gelê kurd, ji tevgera Qoçgiriyê bigre heta nuha li hember vê siyasetê li berxweda û tucar stuyê xwe xwar nekir. Loma ev guherandin berî hertiştî encama xebat û berxwedana milletê kurd e.”

Bozyel behsa cêrgek faktorên ku di destpêkirina vê pêvajoyê de rol leyîstine kir, wek YE (Yekitiya Ewropa), DYA (Amerika) û .h.w.d.. Di berdewamiya axaftina xwe de got: Îro eger berlêvebûna kurd tê niqaşkirin, sedemekî wê yî giring jî, doza Ergenekonê ye.”

Bozyel, herwisa li ser hin erkên giring yên ku dikevin ser milê hêz û kesên siyasî yên kurd sekinî. Wek; piştgiriya vê pêvajoyê, pêkanîna yekitiya hêzên siyasî û berdewamiya xebata rêxistînî û wekî din...

Dû re dor hat pirs û bersivan. Bozyel di gelek pirsan de raya HAK-PARê diyar kir, û guhdariya dîtin û pêşniyazên guhdaran kir. Bi kurtî civîna serokê giştî yê HAK-PARê Bozyel bi dilxweşî û serfirazî gihîşte dawiyê.